Ministrja në detyrë Artane Rizvanolli është sqaruar se nuk ka thënë se do të ketë rritje të importit të energjisë këtë vit dhe vitin tjetër, e as s’ka kërkuar sakrificë, raporton Kujdestari.info.
Sipas saj, ajo ka thënë se importi ka ardhur si pasojë e ndaljes së bllokut B2 për të realizuar investimet në të.
Reagimi i plotë i Rizvanollit:
STOP KEQINTERPRETIMIT E KEQINFORMIMIT
As nuk kam “kërkuar sakrificë”, dhe as nuk kam thënë që “importi do të rritet këtë vit dhe tjetrin”.
Çfarë kam thënë vërtet janë faktet si në vijim:
Një nga arsyet e rritjes së importit gjatë vitit të kaluar ka qenë ndalja e bllokut B2 për të realizuar investimet e domosdoshme që nuk janë bërë për 40 vite (e që jo rrallë në diskursin publik është interpretuar thjesht si “ulje e prodhimit të KEK-ut”, pa sqaruar arsyen dhe përfitimet). Investimet do të vazhdojnë edhe gjatë këtij viti dhe tjetrit, prandaj deri në përfundim të investimeve importi do të vazhdojë të jetë i tillë edhe gjatë këtyre dy viteve.
Prandaj, këto tri vite janë sfiduese, por investimet që po bëhen tani janë një sakrificë që po e bëjmë tash, për të përfituar në afat të gjatë: rritje të jetëgjatësisë së termocentraleve për 20 vite, rritje të kapacitetit të tyre prodhues dhe të sigurisë së furnizimit, dhe ulje të ndotjes nga pluhuri dhe oksidet e azotit.