German Gref, drejtori ekzekutiv i bankës dominuese ruse Sberbank, deklaroi se ekonomia e Federatës Ruse ka arritur një “ngërç” teknik dhe shprehu shpresën që banka qendrore të mos lejojë që ajo të bjerë në recesion.
Ministri i Financave, Anton Siluanov, i tha javën e kaluar presidentit rus, Vladimir Putin se pritet ngadalësim i rritjes ekonomike të Rusisë në 1.5 për qind në vitin 2025, shumë më poshtë parashikimit të mëparshëm prej 2.5 për qind, pasi normat e larta të interesit të vendosura për të ulur inflacionin kanë shtypur kreditimin.
Duke iu drejtuar gazetarëve në margjinat e Forumit Ekonomik Lindor në Vladivostok, drejtori ekzekutiv i Sberbank, Gref, tha gjithashtu se prania e uljes së normave të interesit në 14 për qind deri në fund të vitit nga 18 për qind aktuale nuk është e mjaftueshme për të rilindur ekonominë.
“Është e rëndësishme të dalim nga kjo periudhë e ‘ftohjes së kontrolluar’ të ekonomisë, në mënyrë që ajo të mos shndërrohet në ngërç, sepse ringjallja e ekonomisë do të jetë shumë më e vështirë se ftohja e saj”, tha ai.
“Në nivelin aktual të inflacionit, norma me të cilën mund të shpresojmë për rimëkëmbje ekonomike është 12 për qind ose më e ulët. Pra, diku rreth këtyre niveleve, shumë shpejt do të shohim rimëkëmbje ekonomike”, deklaroi Gref.
Banka Qendrore do të mbajë një takim për vendosjen e normave të interesit më 12 shtator.