Ministrja e Tregtisë në Kosovë, Mimoza Kusari-Lila, ka nënshkruar inicimin e procedurës për Projektligjin për masat e përkohshme të produkteve themelore në rast të krizave ekonomike, i njohur si Ligji për Çmimet Tavan.
Pas miratimit të agjendës legjislative sot në Qeveri, ministrja theksoi se ky projektligj është ndër prioritetet kryesore të ekzekutivit dhe në përputhje me zotimin e Kryeministrit për ta miratuar atë në fillim të mandatit të ri.
Sipas saj, projektligji synon të krijojë bazën ligjore për ndërhyrje të shpejtë dhe të drejtë në rast të:
-
rritjes së papritur të çmimeve,
-
mungesës së produkteve themelore,
-
çrregullimeve në furnizim.
Kusari-Lila deklaroi se qëllimi i ligjit nuk është ndërhyrja arbitrare në treg, por mbrojtja e qytetarëve nga abuzimi dhe spekulimi gjatë krizave ekonomike. Ajo theksoi se masat do të jenë të përkohshme dhe proporcionale, me synim ruajtjen e stabilitetit ekonomik dhe mbrojtjen e interesit publik.
Ministrja bëri të ditur gjithashtu se në hartimin e projektligjit janë marrë parasysh edhe vërejtjet e mëparshme të Gjykatës Kushtetuese, me qëllim ndërtimin e një kornize më të fortë dhe ligjërisht të qëndrueshme.