Kryetari i Komunës së Mitrovicës, Bedri Hamza, mori pjesë në ceremoninë e nënshkrimit të marrëveshjes për ndërtimin e impiantit të ujërave të zeza në Mitrovicë – Vushtrri, një projekt me vlerë prej 39.3 milionë euro. Ky investim ka për qëllim trajtimin e ujërave të zeza sipas standardeve bashkëkohore, duke kontribuar në përmirësimin e cilësisë së mjedisit dhe mbrojtjen e burimeve ujore.
Ceremonia u zhvillua me praninë e kryetarit Bedri Hamza, ministres së Ekonomisë, Artane Rizvanolli, zv. ministrit të Financave, Avni Zogiani, z. Sergiy Maslichenko nga Banka Europiane për Rindërtim dhe Zhvillim (BERZH), kryeshefit të KRU “Mitrovica”, Bashkim Kurti si dhe kryetar të komunave tjera.
Ky projekt është mundësuar me mbështetje financiare nga institucionet ndërkombëtare: Banka Europiane për Rindërtim dhe Zhvillim (BERZH) me 13,5 milionë euro, Banka Europiane për Investime (BEI) me 19,8 milionë euro, WBIF me një grant prej 5 milionë euro, EBRD me një grant prej 700,000 euro dhe SECO – FOPIP me një grant prej 300,000 euro.
Zona e shërbimit do të përfshijë Mitrovicën dhe Vushtrrinë, me mundësi përfshirjeje edhe të pjesës veriore.
Ky projekt ka një rëndësi të veçantë për përmirësimin e trajtimit të ujërave të zeza, që do të ndihmojë në reduktimin e ndotjes së lumenjve dhe përmirësimin e kushteve të jetesës për qytetarët e Mitrovicës.