Ministri në detyrë i Financave, Hekuran Murati, ka publikuar disa të dhëna nga FMN, sipas të cilave Kosova parashikohet të ketë rritjen më të madhe në rajon prej 3.9%.
“Sipas raportit më të fundit të FMN-së, Kosova edhe sivjet do ta ketë rritjen ekonomike më të lartën në rajon. Kjo do të arrihet përkundër sfidave e krizave globale, si dhe duke mos e thelluar deficitin apo borxhin publik“, ka shkruar Murati.
Për këtë, ka reaguar shefja e GP të LDK-së, Hykmete Bajrami. Ish-ministrja e Financave ka publikuar disa të dhëna të viteve të më hershme, ku Kosova kishte rritje më të madhe e që shkonte rreth 6%.
Bajrami ka ndarë të dhënat e viteve 2015, 2016, 2017, 2018 e 2019, duke thënë se në këtë kohë Murati dhe VV rrokullisnin kamionë e gjuanin gaz lotsjellës.
“Sot, Hekurani na qenka krekosë me normë të rritjes 3.9% dhe paska thënë se këtë lajm duhet ta shohim të gjithë, por ajo çka Hekurani s’po përmendë asnjëherë është inflacioni i lartë – norma e inflacionit në shtator ishte 4.7%.”, ka përfunduar ish-ministrja.