Ministria e Bujqësisë do të qëndrojë në objektin ku është deri në janar të vitit 2027, duke paguar edhe 809 mijë euro nga buxheti i shtetit. Me aneks-kontratën e nënshkruar në shtator të këtij viti, qiraja mujore e ministrisë është rritur nga 27.300 euro në 47.600 euro. Ministria ka marrë në shfrytëzim edhe hapësira shtesë, e po ashtu do të paguajë edhe për depo e gjenerator
Zyrtarët e Ministrisë së Bujqësisë do të vazhdojnë të qëndrojnë së paku deri në fund të janarit të 2027-s në objektin ku janë të akomoduar që nga viti 2019, duke paguar kështu edhe rreth 809 mijë euro nga buxheti i shtetit.
Ani se në aneks-kontratën e 2023-tës qiraja mujore ishte përcaktuar 27 mijë e 300 euro, me aneksin e ri të nënshkruar në fillim të shtatorit, ajo është rritur për 20 mijë euro, konkretisht 47 mijë e 600 euro në muaj.
Kjo ministri ka marrë në shfrytëzim edhe 1 mijë metra katrorë, të cilat më parë janë shfrytëzuar nga Agjencia për Zhvillim e Bujqësisë.
Ministria e ka arsyetuar këtë me nevojat shtesë të institucionit, duke thënë se edhe më herët ka shfrytëzuar hapësira që ishin të paguara nga AZHB-ja.
“MBPZHR-ja e ka shfrytëzuar edhe katin e 7-të të objektit, i cili është paguar nga Agjencia për Zhvillimin e Bujqësisë (AZHB). Ndërsa për shkak të rrethanave të reja, ku Ministrisë i është bashkëngjitur edhe Departamenti Qendror i Inspektoratit për Pylltari dhe Gjueti me 12 inspektorë, si dhe zëvendësministri me stafin e tij, kanë kaluar nga kati i 9-të në katin e 8-të. Ne si MBPZHR jemi detyruar ta merrnim në përdorim edhe katin e 8-të”, thuhet në përgjigjen e ministrisë.
Bazuar në dokumentin që posedon KOHA, Ministria e Bujqësisë do të paguajë 1 mijë e 600 euro për një depo për arkivim të dokumentacionit zyrtar prej 200 metrave katrorë, e të cilën në kontratën e kaluar e ka shfrytëzuar pa pagesë.