Numri i ndërmarrjeve të reja të regjistruara në Kosovë ka shënuar rënie të ndjeshme gjatë muajit gusht 2026. Sipas të dhënave të publikuara nga Agjencia e Statistikave të Kosovës (ASK), krahasuar me muajin paraprak, numri i ndërmarrjeve të regjistruara ka rënë për 36,2 për qind.
Rënie është regjistruar edhe në krahasim me periudhën e njëjtë të vitit të kaluar. ASK bën të ditur se, krahasuar me gushtin e vitit 2025, numri i ndërmarrjeve të reja të regjistruara është më i ulët për 5,4 për qind.
Të dhënat e Repertorit Statistikor mbi Ndërmarrjet Ekonomike tregojnë se gjatë gushtit 2026 janë regjistruar gjithsej 1 mijë e 10 ndërmarrje të reja.
Pjesa dërrmuese e tyre janë biznese shumë të vogla. Në kategorinë e mikro-ndërmarrjeve, që përfshin bizneset me zero deri në nëntë të punësuar, janë regjistruar 1 mijë e 3 ndërmarrje. Vetëm shtatë ndërmarrje të reja i përkasin kategorisë me 10 deri në 49 të punësuar.
Gjatë gjithë muajit gusht nuk është regjistruar asnjë ndërmarrje e re në kategorinë e ndërmarrjeve të mesme, me 50 deri në 249 të punësuar, dhe as në kategorinë e ndërmarrjeve të mëdha me 250 apo më shumë të punësuar.
Tregtia vazhdon të dominojë
Sektori më i preferuar për hapjen e bizneseve të reja vazhdon të jetë tregtia. Sipas ASK-së, 207 ndërmarrje të reja, ose 20,5 për qind e totalit, janë regjistruar në sektorin e tregtisë me shumicë dhe pakicë dhe riparimit të mjeteve motorike e motoçikletave.
Në vendin e dytë renditet sektori i informacionit dhe komunikimit, ku janë regjistruar 113 ndërmarrje, që përbëjnë 11,2 për qind të totalit.
Pas tij vijnë aktivitetet profesionale, shkencore dhe teknike me 109 ndërmarrje të reja, apo 10,8 për qind të regjistrimeve gjatë muajit.
Gati gjysma e bizneseve të reja në rajonin e Prishtinës
Të dhënat tregojnë gjithashtu një përqendrim të madh të ndërmarrjeve të reja në rajonin e Prishtinës.
Nga 1 mijë e 10 ndërmarrjet e regjistruara gjatë gushtit, 463 prej tyre janë në rajonin e Prishtinës. Kjo përbën 45,8 për qind të të gjitha regjistrimeve në Kosovë.
Pas Prishtinës renditet rajoni i Prizrenit me 124 ndërmarrje të reja, apo 12,3 për qind, ndërsa në rajonin e Mitrovicës janë regjistruar 93 ndërmarrje, ose 9,2 për qind.
Rajoni i Ferizajt ka pasur 90 regjistrime të reja (8,9 për qind), Peja 88 (8,7 për qind), Gjakova 82 (8,1 për qind), ndërsa numrin më të vogël e ka pasur rajoni i Gjilanit me 70 ndërmarrje të regjistruara, ose 6,9 për qind të totalit.
Të dhënat e ASK-së për gushtin tregojnë kështu jo vetëm një rënie të numrit të regjistrimeve të reja krahasuar me korrikun, por edhe se pothuajse të gjitha bizneset e reja të hapura gjatë muajit janë mikro-ndërmarrje, ndërsa afër gjysma e tyre janë përqendruar në rajonin e Prishtinës. /Kujdestari.info/
