Konkursi për Drejtor Ekzekutiv të Agjencisë Qendrore të Prokurimit ka hyrë në fazën e radhës, por identiteti i kandidatëve që kanë kaluar testin me shkrim nuk bëhet i ditur, shkruan Kujdestari.info.
Ministria e Digjitalizimit dhe Administratës Publike ka publikuar listën e kandidatëve që kanë kaluar testin me shkrim për pozitën e Drejtorit Ekzekutiv në Agjencinë Qendrore të Prokurimit, në kuadër të Ministrisë së Financave.
Megjithatë, në dokument nuk figurojnë emrat e kandidatëve. Në vend të tyre janë publikuar vetëm numra referues.
Në listë janë katër kandidatë, të identifikuar me kodet:
- RAN0157432
- RAN0157258
- RAN0156520
- RAN0153934
Sipas njoftimit, konkursi mban numrin e referencës RN00019637, ndërsa kandidatët kanë kaluar fazën e testimit me shkrim.
Por çfarë është kjo pozitë?
Drejtori Ekzekutiv i Agjencisë Qendrore të Prokurimit është pozitë drejtuese në një prej institucioneve kryesore që lidhen me prokurimin publik në nivel qendror. Agjencia Qendrore e Prokurimit merret me procese të prokurimit që zhvillohen për nevojat e institucioneve publike, duke pasur rol të rëndësishëm në mënyrën se si shpenzohen paratë e buxhetit të shtetit.
Për këtë arsye, pozita e drejtorit të saj është një post me përgjegjësi të konsiderueshme në administratën publike.
Dokumenti i publikuar nga Ministria mban datën 1 shtator 2026 dhe sqaron se kandidatët e pakënaqur me procesin e rekrutimit kanë të drejtë ankese në Këshillin e Pavarur Mbikëqyrës për Shërbimin Civil të Kosovës brenda 30 ditësh. /Kujdestari.info/
