Shtetet e Bashkuara të Amerikës po rezultojnë një treg i rëndësishëm për disa produkte të prodhuara në Kosovë, veçanërisht për industrinë e tekstilit dhe veshjeve, shkruan Kujdestari.info.
Sipas të dhënave të eksporteve për periudhën janar-gusht 2026, nga Kosova drejt SHBA-së janë eksportuar mallra në vlerë prej rreth 15.44 milionë eurosh.
Ajo që bie më së shumti në sy është struktura e këtyre eksporteve. Një pjesë shumë e madhe e mallrave të shitura në tregun amerikan janë fustane për gra dhe vajza.
Vetëm nga disa kategori tarifore të fustaneve, vlera e eksporteve drejt SHBA-së kalon 9.17 milionë euro gjatë tetë muajve të parë të vitit.
Kjo nënkupton se afro 60 për qind e gjithë vlerës së eksporteve të Kosovës drejt SHBA-së në këtë periudhë lidhet vetëm me këto kategori të fustaneve.
Të dhënat tregojnë se tregu amerikan nuk po shërben vetëm si destinacion për produkte tradicionale apo lëndë të para nga Kosova, por edhe për produkte të përpunuara të industrisë së veshjeve.
Eksporti prej mbi 9 milionë eurosh vetëm në fustane për tetë muaj paraqet një vlerë të konsiderueshme për një kategori të vetme produktesh dhe tregon praninë e prodhuesve kosovarë edhe në një treg të madh dhe konkurrues si ai i Shteteve të Bashkuara.
Në total, eksportet drejt SHBA-së prej 15.44 milionë eurosh përbëjnë vetëm një pjesë të eksporteve të përgjithshme të Kosovës, por struktura e tyre e bën këtë treg veçanërisht interesant për industrinë vendore të tekstilit dhe konfeksionit. /Kujdestari.info/
