Themeluesi dhe drejtuesi i kompanisë ajrore GP Aviation, Ganesh Christian Stephan Piga, është raportuar nga media ndërkombëtare se është arrestuar nga autoritetet gjermane nën dyshime për shmangie tatimore dhe shkelje në sektorin e aviacionit. Hetimet, sipas raportimeve, lidhen me një dëm të pretenduar financiar prej rreth 9 milionë eurosh dhe një periudhë disa vjeçare aktiviteti në disa shtete evropiane, raporton Kujdestari.info.
Rasti ka tërhequr vëmendje edhe në Kosovë, pasi kompania operon me degë aktive në Prishtinë dhe realizon fluturime të rregullta drejt destinacioneve evropiane, kryesisht për diasporën.
Si u zhvillua rasti i hetimeve
Sipas mediave zvicerane dhe gjermane, përfshirë Blick dhe AeroTelegraph, ndaj Piga-s janë ngritur dyshime për një seri shkeljesh financiare dhe operacionale që lidhen me menaxhimin e kompanisë në periudhën 2021–2025.
Autoritetet gjermane kanë lëshuar urdhër-arrest ndërkombëtar, ndërsa raportimet tregojnë se ai është ndaluar në kufirin mes Maqedonisë së Veriut dhe Bullgarisë. Më pas, është ekstraduar në Gjermani, ku pritet të përballet me procedurat gjyqësore.
Sipas raportimeve, hetimet nuk lidhen vetëm me aspektin tatimor, por edhe me mënyrën e operimit të kompanisë në disa tregje evropiane të aviacionit, përfshirë përdorimin e strukturave të ndryshme korporative dhe organizimin e operimeve ajrore në shtete të ndryshme.
Në Kosovë, kompania operon si GP Aviation EOOD- Dega në Kosovë.
Sipas të dhënave të Agjencisë së Regjistrimit të Bizneseve të Kosovës, kjo njësi nuk është kompani e pavarur kosovare, por degë e një shoqërie të huaj me bazë në Bullgari.
Kjo nënkupton se aktiviteti në Kosovë është pjesë e një strukture më të gjerë ndërkombëtare, ndërsa vendimmarrja kryesore dhe kontrolli korporativ ndodhen jashtë Kosovës.
Drejtor menaxhues është Ganesh Christian Stephan Piga.
Përfaqësues i autorizuar, Genc Rramanaj.
Pronar i degës: GP Aviation EOOD (100%).
Kjo strukturë tregon një ndarje mes menaxhimit ekzekutiv dhe përfaqësimit lokal, ku Kosova shërben kryesisht si bazë operative për aktivitetet rajonale të kompanisë.
Sipas një vendimi të Autoritetit të Aviacionit Civil të Kosovës, të datës 24 prill 2024, GP Aviation ishte emëruar/dezignuar si operator ajror për ushtrimin e të drejtave të trafikut ajror ndërmjet Kosovës dhe Zvicrës.
Në dokument thuhet se kompania ishte autorizuar për një periudhë trevjeçare, në përputhje me marrëveshjet ndërkombëtare për shërbime ajrore ndërmjet Kosovës dhe Konfederatës së Zvicrës.
AAC kishte vendosur edhe kushte specifike ndaj operatorit, përfshirë:
Dorëzimin e një garancie bankare prej 100 mijë eurosh;
Fillimin e fluturimeve të rregullta deri më 1 qershor 2024;
Detyrimin për respektimin e kritereve të përcaktuara nga AAC.
Në arsyetimin e vendimit, AAC kishte theksuar se synimi ishte zhvillimi i konkurrencës në tregun e fluturimeve Kosovë–Zvicër dhe ofrimi i shërbimeve me çmime konkurruese për udhëtarët.
Dokumenti po ashtu sqaron se GP Aviation kishte shprehur interes zyrtar për operime të rregullta drejt Cyrihut, Gjenevës dhe Bazelit, ndërsa një grup pune i AAC-së kishte konstatuar se kompania i kishte përmbushur kriteret administrative për autorizim.
Megjithatë, në vendim përmendet se AAC rezervon të drejtën për revokimin e autorizimit në rast të mos-përmbushjes së kritereve ose në rast të ndryshimeve në operimin e kompanisë.
Kompania operon kryesisht përmes modelit charter dhe “wet lease”, ku avionët dhe ekuipazhi jepen me qira për operatorë të tjerë ajrorë ose për linja sezonale.
Ky model përdoret gjerësisht në industrinë evropiane të aviacionit, sidomos nga kompani me flotë të kufizuar, të cilat mbështeten në partneritete operative dhe kontrata afatshkurtra për destinacione specifike.
Mediat ndërkombëtare kanë raportuar se pikërisht struktura komplekse e operimeve dhe rrjeti ndërkombëtar i kompanive të lidhura janë pjesë e interesimit të autoriteteve hetimore në Gjermani. /Kujdestari.info/