Rajoni jugor i Algarves në Portugali përjetoi një “valë të nxehti detar”, tha të martën Autoriteti Detar i vendit, pasi mblodhi rezultatet e regjistruara nga një pajisje lundëruese në det pranë plazheve të Faros midis 28 qershorit dhe 9 korrikut.
Dhe sipas të dhënave, ujërat përreth plazheve në zonë arritën temperatura deri në 25.1°C, përcjell Telegrafi.
Temperaturat janë “dukshëm më të larta” se mesatarja e 20 viteve të fundit, duke treguar shfaqjen e një fenomeni ekstrem të quajtur “valë të nxehti detar”, sipas një deklarate të publikuar në faqen e internetit të Marinës Portugeze.
“Një ‘valë e nxehti detar’ konsiderohet të ndodhë nëse temperatura ditore e detit tejkalon, për të paktën pesë ditë rresht, një kufi të lartë statistikor…”, tha deklarata.
Sipas deklaratës, temperatura ditore e ujit të detit e regjistruar në Faro “e tejkaloi temperaturën mesatare me më shumë se 5°C” dhe për këtë arsye korrespondon me “kategorinë e valës së të nxehtit detar që konsiderohet ekstreme”.
“Temperatura mesatare u përcaktua nga të dhënat e mbledhura në Faro gjatë 20 viteve të fundit (2004-2024), duke shërbyer si referencë për identifikimin e ngjarjeve të valës së të nxehtit detar”.
Që nga mbledhja e të dhënave, temperaturat janë kthyer në normale me detin në Algarve tani më të freskët, me ujin midis 18 dhe 20°C.