Ari mbetet “streha” më e sigurt e pasurisë. Çmimi i arit është rritur me më shumë se 30% që nga fillimi i vitit, një performancë që i tejkalon ndjeshëm indekset e tregut të aksioneve. Në terma realë (bashkë me inflacionin) rritja të kujton periudhën 1979-1980. Ari tejkaloi nivelin më të lartë historik të janarit 1980, duke arritur në 3 643 dollarë/ons.
Historikisht, ari ka shërbyer si mbrojtja përfundimtare kundër inflacionit. Pasiguritë, politike, gjeopolitike dhe ekonomike favorizojnë arin pasi ai konsiderohet një aset i sigurt. Kjo do të thotë se investimet ruajnë ose rrisin vlerën e tyre në periudha paqëndrueshmërie dhe rëniesh të tregut. Ari gjithashtu forcohet gjatë periudhave të inflacionit të lartë si ato të viteve të fundit.
Kur vlera e dollarit ulet, çmimet e arit kanë tendencë të rriten. Nga ana tjetër, kur dollari rritet në vlerë, çmimet e arit kanë tendencë të ulen. Bankat qendrore kanë kontribuar gjithashtu në rritjen e çmimit të “metalit të verdhë”. Blerësit më të mëdhenj të arit në mbarë botën janë Bankat Qendrore. Në vitin 2024, ata shtuan më shumë se 1 200 tonë në rezervat e tyre, rritja më e madhe vjetore e rezervave në të paktën 50 vjet. Investimet globale të arit regjistruan një muaj të tretë radhazi me hyrje në gusht, duke arritur në 5.5 miliardë dollarë.
Ka edhe nga ata që investojnë në aksione të kompanive të minierave të arit. Kjo është një mënyrë më indirekte për të investuar në ar, pasi ju nuk e zotëroni personalisht arin. Vlera e aksioneve të minierave të arit zakonisht luhatet, duke ndjekur nga afër çmimin e arit.
Nëse investoni në ar fizik, të ardhurat e vetme që merrni nga ari janë fitimet nëse çmimet e arit rriten mbi çmimin e tregut. Megjithatë, disa aksione të kompanive të minierave të arit paguajnë dividentë, kështu që është e mundur të gjeneroni të ardhura pasive.