Në fund të vitit 2025, çmimet e prodhimit në Kosovë kanë shënuar rritje të lehtë tremujore, por me një shtim dukshëm më të fortë në krahasim me vitin paraprak. Të dhënat e publikuara nga Agjencia e Statistikave të Kosovës (ASK) tregojnë se Indeksi i Çmimeve të Prodhimit (IÇP) në tremujorin e katërt (TM4) 2025 u rrit me 0,1% krahasuar me TM3 2025, ndërsa në baza vjetore (TM4 2025 krahasuar me TM4 2024) rritja arrin në 5,4%.
Rritje simbolike nga tremujori në tremujor
Sipas ASK-së, ndryshimi mes TM4 dhe TM3 2025 është minimal – vetëm 0,1%. Megjithatë, disa sektorë kanë shënuar lëvizje më të theksuara.
Rritjet më të mëdha tremujore u regjistruan në:
prodhimin e letrës dhe produkteve prej letrës (+3,2%),
prodhimin e makinerisë dhe pajisjeve (+2,3%),
prodhimin e drurit dhe produkteve të drurit (+2,1%),
shtypjen dhe riprodhimin e mediave të incizuara (+1,1%).
Rritje më të lehta u evidentuan edhe në energji elektrike, gaz dhe avull (+0,2%), tekstil (+0,2%) si dhe në prodhimin e veshjeve (+0,1%).
Nga ana tjetër, rënia në disa sektorë e zbuti efektin e përgjithshëm. Prodhimi i metaleve shënoi rënie prej 3,7%, ndërsa ulje pati edhe në trajtimin e mbeturinave (-1,2%), prodhimin tjetër p.k.t. (-1,1%) dhe mobiliet (-0,3%).
Krahasimi vjetor: energjia në krye të rritjes
Në krahasim me tremujorin e katërt të vitit 2024, çmimet e prodhimit janë rritur mesatarisht për 5,4%.
Rritja më e theksuar është regjistruar në sektorin e energjisë elektrike, gazit, avullit dhe furnizimit me ajër të kondicionuar, me një rritje prej 20,9% brenda vitit.
Po ashtu, rritje të ndjeshme janë evidentuar në:
prodhimin e mjeteve motorike (+9,0%),
prodhimin e veshjeve (+8,6%),
produktet farmaceutike (+8,1%),
makineri dhe pajisje (+7,6%),
prodhimin e letrës (+6,2%).
Megjithatë, disa sektorë kanë shënuar rënie vjetore, duke ndikuar në balancimin e indeksit të përgjithshëm. Prodhimi i metaleve ka rënë për 11,6%, ndërsa trajtimi i mbeturinave për 4,4%. Ulje janë regjistruar edhe në prodhimin e mobilieve (-0,8%) dhe të pijeve (-0,7%).
Trend rritës në pesë vitet e fundit
Sipas të dhënave të ASK-së, zhvillimi i IÇP-së për periudhën TM1 2021 – TM4 2025 (me bazë 2021=100) tregon një trend të përgjithshëm rritës të çmimeve të prodhimit në vend, me luhatje të theksuara në sektorë të caktuar industrialë.
Rritja e kostos në energji dhe në sektorë të përpunimit industrial pritet të reflektohet edhe në çmimet e produkteve finale në treg, duke ushtruar presion shtesë në ekonomi gjatë vitit 2026. /Kujdestari.info/