Agjencia Qendrore e Prokurimit (AQP) ka realizuar një tender me procedurë të hapur për angazhimin e një eksperti ndërkombëtar që do të ofrojë konsulencë për implementimin e projektit të bartshmërisë së numrave për nevojat e Autoritetit Rregullator të Komunikimeve Elektronike dhe Postare (ARKEP)
Pavarësisht se tenderi ishte i hapur, në garë ka marrë pjesë vetëm një ofertues – eksperti britanik James Wild, i cili është shpallur fitues nga AQP.
Kush është eksperti i angazhuar?
Sipas dokumenteve të prokurimit, fituesi i tenderit është James Wild nga Tackley, Angli, një ekspert i sektorit të telekomunikimeve dhe veçanërisht në fushën e bartshmërisë së numrave (number portability). Wild rezulton të ketë përvojë shumëvjeçare në asistimin e autoriteteve rregullatore dhe operatorëve në vende të ndryshme, duke ofruar ekspertizë në proceset e kalimit të numrit nga një operator tek tjetri.
Në këtë kontratë, ai do të veprojë si konsulent i jashtëm ekskluziv për ARKEP-in.
Kontrata, me vlerë 15 mijë euro, do të zgjasë 6 muaj, ndërsa shërbimet e konsulentit do të fillojnë menjëherë pas nënshkrimit të kontratës dhe kërkesës nga ARKEP-i.
Në terma praktikë, kjo do të thotë një kosto rreth 2,500 euro në muaj, përfshirë të gjitha detyrat e parashikuara.
Detyrimet kryesore të konsulentit sipas kontratës:
Të ofrojë shërbime këshillimore sipas kërkesave të ARKEP-it, të përshkruara në Aneksin 1 – Termat e Referencës.
Të asistojë në procesin e testimeve ndërmjet operatorëve në kuadër të implementimit të sistemit të bartshmërisë së numrave.
Të dorëzojë raportin përfundimtar mbi detyrat e realizuara brenda periudhës 6-mujore.
Obligimet e ARKEP-it:
Brenda 3 ditëve nga marrja e kontratës së nënshkruar, ARKEP është i obliguar të hartojë Planin e Menaxhimit të Kontratës.
Të emërojë një përfaqësues të vetëm, i cili shërben si pikë koordinimi midis konsulentit, AQP-së dhe autoritetit rregullator.
Çfarë është projekti i bartshmërisë së numrit?
Bartshmëria e numrave (number portability) është një proces që i lejon përdoruesit e telefonisë të ndërrojnë operatorin, por të mbajnë numrin e tyre të vjetër.
Ky projekt është një prej reformave të rëndësishme të tregut të telekomunikimeve, duke ndikuar drejtpërdrejt në konkurrencë dhe në të drejtat e konsumatorëve. ARKEP prej vitesh ka paralajmëruar implementimin e tij, ndërsa ky angazhim i konsulentit ndërkombëtar vlerësohet si fazë ndihmëse drejt përmbylljes së projektit.