Kostoja e prodhimit bujqësor në Kosovë ka vazhduar të rritet edhe gjatë këtij viti. Të dhënat e publikuara nga Agjencia e Statistikave të Kosovës (ASK) tregojnë se çmimet e inputeve në bujqësi janë rritur mesatarisht për 7.4 për qind në tremujorin e dytë (TM2) të vitit 2026, krahasuar me të njëjtën periudhë të vitit të kaluar, shkruan Kujdestari.info.
Sipas raportit, rritja më e madhe është shënuar te Inputi 1, që përfshin mallrat dhe shërbimet që konsumohen në procesin e përditshëm të prodhimit bujqësor. Ky indeks është rritur për 10.6 për qind në krahasim me TM2 të vitit 2025.
ASK sqaron se indeksi është përpiluar mbi bazën e çmimeve të grumbulluara në barnatore bujqësore, farmaci veterinare, kompani, tregje dhe pika të tjera ku tregtohen inputet bujqësore në Kosovë.
Në kategorinë e inputeve të konsumit të përditshëm përfshihen farërat dhe materiali mbjellës, energjia dhe vajrat, plehrat dhe përmirësuesit e tokës, pesticidet dhe produktet për mbrojtjen e bimëve, shërbimet veterinare, ushqimi për kafshët, mirëmbajtja e makinerive, mirëmbajtja e ndërtesave, si dhe mallra e shërbime të tjera të nevojshme për aktivitetin bujqësor.
Ndërkaq, te investimet bujqësore përfshihen makineritë dhe pajisjet, ndërtimet e objekteve të fermave dhe investime të tjera infrastrukturore.
Rritja e çmimeve të inputeve nënkupton se fermerët po përballen me kosto më të larta të prodhimit, çka mund të ndikojë edhe në çmimet e produkteve bujqësore për konsumatorët në periudhën në vazhdim. /Kujdestari.info/